रोल्पाको त्रिवेणी गाउँपालिकाका १२ विद्यालयमा नर्सिङ सेवा सुरु गरिएको छ । नेपाल सरकार र स्थानीय सरकारको सहयोगमा गाउँपालिकाका ती विद्यालयले नसिङ सेवा सुरु गरेका हुन । विद्यालय नर्सिङ सेवाका लागी गाउँपालिकाले खुल्ला प्रतिस्पर्धाको आधारमा १२ जना नर्स छनौट गरि सकेको छ ।
यसरी नर्सिङ सेवा उपलव्ध गराउने विद्यालयहरुमा जनजागृती मावि जुगार, सरस्वती मावि काउलावोट जुगार,शिद्धरत्न मावि हान्जावाङ जुगार,सरस्वती मावि लिडदुङ वुढागाउँ,जनकल्याण मावि सिम्पानी वुढागाउँ र वीरेन्द्र मावि गाङ गैरीगाउ रहेका छन । विद्यालय नर्सको सुविधा उपलव्ध गराउने गाउँपालिका भित्रका अन्य विद्यालयहरुमा गोविन्द मावि गैरीगाउ,अरनिको मावि नुवागाउँ, शुक्र मावि झुमलुङ नुवागाउ,शिव मावि द्धारपानी नुवागाउ, भगवती मावि दहवन नुवागाँउ र बालकल्याण मावि करेटी रहेको गाउाँपलिकाले जनाएको छ ।
नेपाल सरकारको प्रचलित सेवा सुविधा पाउने गरि नियुक्त नर्सहरुले गाउपालिका भित्रका १२ वटा माध्यमिक विद्यालयहरुमा सेवा दिने छन् । ‘विद्यालयमा स्वास्थ्य सेवाको काम गर्ने गरि कार्यसम्पादन तोकिएको छ त्यसैका आधारमा काम गर्छन्’, गाउँपालिकाका प्रमुख प्रशासकीय अधिकृत निमवहादुर केसीले भने ।
‘नियुक्ती लगत्तै विद्यालय बन्द भएका कारण उनीहरु अझै कार्यक्षेत्र जान पाएका छैनन्’ गाउँपालिका प्रमुख प्रशासकीय अधिकृत केसीले भने । ‘कोरोनाका कारण विद्यालय वन्द हुँदा उनीहरुलाई कोरोना हेल्थ डेस्कमा खटाइएको छ ।’
विद्यालय नर्सहरुको खर्च व्यवस्थापन नेपाल सरकारको ९० प्रतिशत र गाउपालिकाको १० प्रतिशत बजेटबाट गरिने भएको केसीले जानकारी दिए ।
उनीहरुले आफु खटिएको विद्यालयमा नियमित चेकजाँचका साथै विभिन्न स्वास्थ्य तथा सचेतनामुलक कार्य गर्नेछन् । पोषणयुक्त खानेकुराको महत्व बुझाउदै विद्यार्थीहरुलाई त्यस्ता खानाको प्रयोगमा जोड दिने काममा नर्सलाई जिम्मेवारी दिइने भएको छ । विद्यालयमा स्वास्थ्य उपचारका लागि आवश्यक सम्पूर्ण उपकरण भने स्वास्थ्य मन्त्रालयले व्यवस्था गर्ने जनाइएको छ ।
विद्यालय स्वास्थ्यको सवै खाले सेवा र व्यवस्थापन नर्सहरुले गर्नेछन् । किशोरकिशोरीहरुको प्रजनन तथा यौन स्वास्थ्यका बारेमा सचेततना, महिनावारी व्यवस्थापन, हिंसाबाट बालबालिकालाई कसरी वचाउने भन्ने, सिप हस्तान्तरणको जिम्मेवारी पनि नर्सको हुने बताइएको छ । विद्यालय खानेपानी तथा सरसफाई संचालन र व्यवस्थापन, विद्यालय स्तरबाटै जुकाको औषधी वितरण, खोप कार्यक्रम र स्वास्थ्य शिक्षा संचालन गर्नेछन । विद्यालयमा प्राथमिक उपचार र आवश्यकता अनुसारको स्वास्थ्य परिक्षणको जिम्मेवारी समेत दिइएको छ ।
विद्यार्थीहरुले लामो समय विद्यालयमा व्यथित गर्दा उनीहरुको स्वास्थ्य संवेदनशीलता पनि उत्तीकै ध्यान दिनुपर्ने विषय भएकाले सरकारले यस्तो कार्यक्रम ल्याएको हो । संघीय सरकारले प्रदेश ५ को वाँके जिल्लामा पर्ने राप्ती सोनारी गाँउपालिका र रोल्पाको त्रिवेणी गाउपालिकामा यस्तो कार्यक्रम सञ्चालन गरेको छ ।
रोल्पाका २ वटा नमुना माविहरु वालकल्याण नमुना मावि लिवाङ र मावि मौलावोट राङ्कोटले यस पूर्व नै आन्तरिक स्रोतवाट खर्च व्यवस्थापन गर्ने गरि विद्यालय नर्सिङ कार्यक्रम सुरु गरिसकेका थिए ।
२०७७ बैशाख ३ गते १३:४७मा प्रकाशित
