२०७६ चैत्र २५ गते

नक्कली प्रमाणपत्रधारीमाथि अख्तियारको नजर

अन्तैबाट

काठमाडौं  । अख्यितार दुरुपयोग अनुसन्धान आयोगले नक्कली शैक्षिक प्रमाणपत्र पेस गरेर सरकारी सेवामा प्रवेश गरी सेवा सुविधा लिएका र बढुवासमेत भएका ६ कर्मचारीमाथि छुट्टाछुट्टै मुद्दा दायर गरेको छ । आयोगका अनुसार यस्ता प्रकृतिका मुद्दा बिहीबार ५ र शुक्रबार एउटा दायर गरिएको थियो । नक्कली शैक्षिक प्रमाणपत्र लिएको आरोप लगाइएकामा शिक्षक, कर्मचारी लगायत प्राविधिक कर्मचारीसमेत छन् ।

आयोगले भारतस्थित माध्यमिक शिक्षा परिषद् उत्तर प्रदेश इलाहवादको इन्टरमिडिएट परीक्षा उत्तीर्ण प्रमाणपत्र पेस गरी निमावि तहको शिक्षकमा बढुवा भई हाल कालिका मावि बन्दिपुरका शिक्षक श्रीप्रसाद पौडेलको शैक्षिक योग्यताको प्रमाणपत्र नक्कली रहेको आरोपपत्र दायर गरेको छ । त्यसैगरी, परीक्षा नै नदिई स्नातक तहको झूठो शैक्षिक योग्यताको प्रमाणपत्र पेस गरी सोही आधारमा प्रहरी निरीक्षक तथा प्रहरी नायब उपरीक्षक पदमा समेत बढुवा भई सरकारी लाभ तथा सुविधा लिएको आरोपमा तत्कालीन प्रहरी निरीक्षक अरुणकुमार शाह, विद्यालय परीक्षा समिति, पटना भारतबाट माध्यमिक परीक्षा उत्तीर्ण गरेको झूठो शैक्षिक योग्यताको प्रमाणपत्र पेस गरेर स्थायी नियुक्ति भई लाभ तथा सुविधासेमत लिएको आरोपमा कुमारी आधारभूत विद्यालय शुक्लागण्डकी, तनहुँका शिक्षक शारदा अधिकारी (लामिछाने)माथि विशेष अदालत, काठमाडौंमा आरोपपत्र दायर गरेको छ ।

त्यस्तै, नेपाल टेलिकममा कार्यरत प्राविधिक अधिकृत जयनारायण प्रसाद साहमाथि पनि मुद्दा दायर गरेको छ । आयोगका अनुसार साहमाथि बिएको शैक्षिक योग्यताको प्रमाणपत्र झूठ रहेको आरोप छ । माध्यमिक शिक्षा परिषद् उत्तर प्रदेश, भारतबाट हाइस्कुल परीक्षा उत्तीर्ण गरेको नक्कली शैक्षिक योग्यताको प्रमाणपत्र पेस गरी खरिदार पदमा बढुवा भई लाभ सुविधासमेत लिएको पुष्टि हुन आएको आरोप लगाइ जिल्ला हुलाक कार्यालय, बाँकेमा तत्कालीन खरिदार पदमा कार्यरत निर्मलाकुमारी केसी, माध्यमिक शिक्षा परिषद उत्तर प्रदेश बोर्ड अफ हाईस्कुल एण्ड इन्टरमिडिएट एजुकेसन युपी भारतबाट उत्तीर्ण गरेको नक्कली शैक्षिक योग्यताको प्रमाणपत्र पेस प्रहरी सहायक निरीक्षकमा बढुवा भई सरकारी सुविधा तथा लाभसमेत लिएको आरोपमा पूर्वप्रहरी सहायक निरीक्षक धीरेन्द्रकुमार शाहीमाथि मुद्दा दर्ता गरेको छ ।

सेवा ग्राहीसँग ४० हजार घुस
आयोगले भूमिसुधार तथा मालपोत कार्यालय नवलपरासी बर्दाघाट(सुस्ता पश्चिम)का खरिदार नेत्रबहादुर चौधरी (थारू) ले मोही जग्गा बाँडफाँट गरिदिने नाममा विभिन्न बहाना बनाई सेवाग्राहीसँग पटकपटक घुस मागेको आरोप लगाउँदै शुक्रबार विशेष अदालत, काठमाडौंमा आरोपपत्र दायर गरिएको छ । चौधरीले जग्गा बाँडफाँट गरिदिने प्रयोजनको लागि ४० हजार रुपैयाँ घुस माग गरेको पुष्टि भएको आयोगले जनाएको छ ।

यसैगरी, आयोगले शुक्रबार महानगरीय ट्राफिक प्रहरी प्रभाग कोटेश्वरमा कार्यरत प्रहरी जवान लोग बहादुर खड्काले ड्युटीमा खटिएको अवस्थामा सेवाग्राहीसँग मोटरसाइकलको कागजात मागी कुनै चिट नदिएर मिलाउनुस् भन्दै घुस मागेको आरोपमा शुक्रबार विशेष अदालत, काठमाडौंमा मुद्दा दायर गरेको छ । आयोगको टोलीले खड्कालाई सेवाग्राहीबाट २ हजार घुस लिइसकेको अबस्थामा उनलाई नियन्त्रणमा लिएको थियो ।

 भुवन शर्माले नागरिकमा खबर लेखेका छन् ।

Comments: